الحرب حققت انجازات غير مسبوقه !

11:32 م
2024-03-29

اكرم الصوراني

● كنّا متعودين ننام على ‘تخت’ وفرشه خمالتها 30سم صرنا ننام على الأرض لغاية ما حصلنا على فرشة خمالتها 4سم وهذا انجاز غير مسبوق..
● نسوانا كانوا يغسلو على غسالات ‘فل أوتوماتيك’ تعلّمو غسيل ‘الطشت’ والبح والعصر اليدوي في العصر الحادي والعشرين وهذا انجاز غير مسبوق..
● اولادنا كانوا يمسكو الكتب يدرسوا فيها صاروا يرموها مع الحطب ولّعوا بالتاريخ والجغرافيا والتربية الوطنيّة وهذا انجاز غير مسبوق..
● اولاد أختي كانوا ‘مأنَّفين’ ويغسلو الخضرة والفاكهة بالخل صاروا ياكلوها بدون غسيل وهذا انجاز غير مسبوق..
● كنت أنام على صوت الهدوء صرت أنام وأصحى على صوت ‘سرسكة اسنان’ طلعت اسنان ‘أبو السّيد’ فرشته مقابل فرشتي وأسنانه بتنام في وداني، والمنبه بتوقيت ‘شَخّة خضر’، والصحوة من صراصير الصبح على صوت أصغر نازح، الطفل المعجزة ‘مروان’ الذي يُشبه في شكله وحركاته السريعه الخاطفة لكل شيء حتى للنّوم من عيونك الطفل الشهير في فيلم ‘Home Alone’، وحتى لا تَمُر قصة ‘شخّة خضر’ خاصة لمن يقتله الفضول، مختصر القصة أن منبّه جوال والدة خضر يرن كل ليلة عند الثالثة بعد منتصف الليل وهو توقيت ‘شخته’ الليلي، لانّو خضر لو ما ‘شخ’ في هذا التوقيت مشكلة، مشكلة مع تفاصيل تحميم الأطفال في الحرب، ومشكلة مع نشر الفرشة، ومشكلة بين الفرشة والمطر، ومشكلة مع غسيل الأواعي.. حدوته تَدوخ وأنت تشرح وتَشُم تفاصيلها، المهم صرنا ومنعاً للمشاكل نصحى كل ليله على صوت رنّة الجوّال وصوت ‘شخّة خضر’ دون أي تَأَفُّف أو تَذَمُّر وبصمت عالي المستوى وهذا انجاز غير مسبوق..
● كان عنّا بيوت وأبواب وشبابيك صار عنّا خيمة وصرنا ننام فيها وعاملين ‘رحلة سفاري’ مفتوحة ومجانية وهذا انجاز غير مسبوق..
● كنّا نشتري البندورة والخيار والبطاطا والبصل بالكيلو والرطل صرنا نشتريهم ‘زي الأجانب’ بالحبّة وهذا انجاز غير مسبوق..
● كنا بكرش ومتختخين وأقل واحد فينا 100 كيلو عملنا ريجيم رباني وأقل واحد نزل 20 كيلو وهذا انجاز غير مسبوق..
● كنّا نشرب الشاي مع السّكر والملح نرشو رش صرنا عاملين حميه طبيعية وبطّلنا السّكر والملح وهيك ضمننا حياة صحيّه من غير سكري ولا ضغط وهذا انجاز غير مسبوق..
● كانوا الاولاد يروحوا ع المدرسة يتعلمو صاروا يتعلمو تجارة المعلبات وبيع كراتين المساعدات وتطيير الأطباق ولعب الجلول في الخيم والحارات والشحدة على البسطات وهذا انجاز غير مسبوق..
● كانت الناس تعذّب حالها وتلبس وتصحى الصبح على شغلها صارت تصحى وتنام بنفس الأواعي وتداوم على ابواب البنوك ومحلات الصرافه لاستلام الحوالات وبتداوم على طابور الطحين وطابور الغاز والبنزين وارتاحت من الشغل وهذا انجاز غير مسبوق..
● العلاقات الاجتماعية كانت قائمة على النفاق والمجاملة اليوم بعد الحرب الناس لعنت بعض وكشفت حَسَب بعض والحماية دَقّت بالكنّه والكنّه دَقّت بامها وامها دقت بخالها وخالها دق في عمها وعمها دق في أبوها وأبوها دق في الخشبة مسمار وعمل خيمة وكتب عليها دار ‘أبو ازدهار’ وهذا انجاز غير مسبوق..
● كنّا نركب سيارة لباب الدار صرنا نمشي أميال وأمتار ونركب عند اللزوم توكتوك وجار ومجرور وشحن تبع العجول وكارة حمار وهذا انجاز غير مسبوق..
● كنّا ما يعجبنا العجب و’نتمزرط’ شو ناكل وايش نطبخ بعد الحرب صرنا ناكل كلشي ما عدا الأكل ونطبخ كلشي ما عدا الطبيخ وهذا انجاز غير مسبوق..
● كنّا نتحمم مرتين في الأسبوع صرنا نتحمم ولا مرّة في الشهر وهذا انجاز غير مسبوق..
● كنّا اصحاب إحنا واللحمة والجاج وكانت بيننا عِشرة عُمر وعِشرة مقلوبة وقِدَر صرنا لمّا نشوفهم كإنّا بنتقابل لأوّل مرّة ونِفِسنا يطوّل الحُضن وهذا انجاز غير مسبوق..
● كان آخر همنا الأكل صار أوّل همنا الأكل وبعد مشاهدة الناس وهيّا تهجم على قوافل المساعدات وتحاول ‘سرقة’ ما تيسّر من طرود تشاهد لأول مرّة في حياتك الفقر وهو يمشي على عكاز، وتتمكن بكل سلاسه دون الحاجه لمدرس قواعد خصوصي من استيعاب معنى الحرمان واعراب جملة ‘الجوع كافر’ وهذا انجاز غير مسبوق..
● كنّا مش فاهمين شو يعني ‘دخول الحمّام مش زي خروجه’ بعد الحرب فهمناها كتير صار لما بدّك تروح الحمّام لازم تاخد لفّة ‘الفاين’ تبعتك معك وتقتصد في التمسيح، وفي ترشيد استخدام المي، هاد لو كان في ميّ لانك فجأة تكتشف أن أصعب وأوسخ أنواع الاصابات في الحرب اصابة غادرة بالاسهال والميّ قاطعه ومطلوب تدبّر حالك وتدخل في صراع سيكولوجي بين عقلك ومؤخرتك وتحسم الصراع لصالح عقلك وتحتفظ بفضلات بطنك.. وصارت الرحلة الليلية من الخيمة للحمّام ومن الحمّام للخيمة فرصة لتأمّل الطبيعة وهذا انجاز غير مسبوق..
● كنّا نشتري أكلنا وشربنا وتفاصيل بيوتنا.. صرنا نستلم طحين ومعلبات وتمر وفرشات ودبان أوّل مرّة أشوفه بحياتي وهذا انجاز غير مسبوق..
● كنّا نعرف منيح عزّة النفس ونعرف منيح الكرامة.. بعد الحرب تعرفنا عليهم أكتر.. وزي ما بحكو ما بتعرف حد إلا لمّا تعاشرُه.. والعِشرَة ما بتهون إلا على أولاد الحرام.. هانت عليهم العِشرة.. وهُننا على أنفسنا وهذا انجاز غير مسبوق..
● كانت تدفينا حيطان بيتنا.. وكانت لمّة العيلة أحلى ما في العيلة.. بعد الحرب صار كل حدا في مكان وصار السفر ع الدّور كشوفات ودولارات وعائلات بتسيب البلد وتهاجر أسراب زي الحمام الزاجل وهذا انجاز غير مسبوق..
● صارت الناس تبيع سياراتها ومصاغ ذهب زوجاتها بثمن رخيص وتافه من أجل تأمين مبلغ الهروب وهذا انجاز غير مسبوق..
● كان المدخنين يحرقوا في اليوم علبتين دخان وبعد الارتفاع الجنوني في كل أسعار السلع ومنها الدّخان، الذي وصل سعر سيجارتين ما يعادل سعر علبتين، توقف العديد من المدخنين عن السجائر ما أدى إلى تحسُّن جودة صحتهم ورئتهم وريحة نفسهم وهذا انجاز غير مسبوق..
● الناس تعوّدت على شرب الميّه أيّاً كان مصدرها ونسبة تلوّثها وتعوّدت معدتها على البكتيريا وباتت الاصابة بالانفلونزا والكبد الوبائي أمر عادي ولو شربت ميّه معدنيه وأكلت أكل حقيقي ومحترم ستصاب بالمرض من النضافة غير المعتادة.. مناعة الناس أصبحت عالية جداً ضد الأمراض والجراثيم وهذا انجاز غير مسبوق..
● كنّا ولا مرّة نتخيّل كيف في ناس بتنام في خيمة بين السّما والأرض.. بالشّارع.. تترك بيوتها وتنام بخيمة.. وبطّلنا نتخيّل.. صارت الخيمة حقيقة.. نسينا حياتنا قبل الحرب.. كإنها كانت حلم.. راح البيت وراحت كل تفاصيل حياتنا.. وتشفّرت أحلامنا.. وتفرمَتَت ذكرياتنا.. وصارت الخيمة بيتنا.. وصرنا مشرديّن وهذا كله انجاز غير مسبوق..